ماذا بعد

كان بيدور علينا يصحينا علشان ننضف تنضيف العيد.
عبدالله هتغسل سجادة وعلي هيمسح السلالم وصالح هيكنس السطوح شهاب هيغسل الستاير بعدها هننزل على الشقة تحت تتكنس وتتنضف وتتمسح والفرش يتغسل ويتنشر وبعدها تريحوا شوية بعد الفطار وتقوموا بقى علشان خبيز العيد .
يا حاج إحنا ولادك مش فلبينيين صدقني.
اللي قولته يتسمع ياض.
المعترض دا كان شهاب أنا عايش معاهم وهما بيحاولوا بقدر الإمكان يخلوني واحد منهم لحد ما فعلا بدأت أبقى كدا حسيت إنهم عيلتي مش العيلة بس اللي بتبقى شايل اسمهم لاء دي بتكون الناس اللي بتحتويك وقت حزنك ولما تقع وتفرح لفرحك ونجاحك وتسندك في حياتك لما تقع.
يا اختاي آه يا أني يا أمي يا ضهري.
آه يا أني يا أمي يا أبوي.
تنضيف العيد دا ولا تخليص ذنوب يا حاج قولي بالله عليك.
رد عم عابد على عبدالله ياض قوي عضمتك قبل ما تكبر وبعدين ما أهو خلاص خلصنا.
خلصنا تنضيف العيد والنهاردة الوقفة الوقت بيجري بسرعة وخاېف من مقابلتهم يارب هون يارب جبر يليق بعظمتك.
سهرنا كلنا بمناسبة إنها ليلة الوقفة وكام ساعة وتشتغل التكبيرات كل واحد فينا جهز جلابيته وكإننا عيال صغيرة فرحانة ببهجة العيد بس دا كان أمر من عم عابد وهو بيقولنا أحيو شعائر الله واننا المفروض نفرح بالعيد ونظهر فرحتنا بيه.
يا علي فين البرفان بتاعي اللي جبته امبارح 
خدت نصفه في ازازة وباقيها تحت.
يا عم الحاج انتو سايبين اوضكم تحت وجايين تستولوا على حاجتي إكمي غلبان
والله طيب والتي شيرت اللي لابسه والشراب دول بتوع مين
بتوعك يا غالي.
علاقتي مع علي تشبه لعلاقة ناقر ونقير لبسنا ونزلنا جري إحنا الاتنين عم عابد كان واقف وبيدي كل واحد فيهم العيدية بتاعته اداهم لحد ما جهه دوري مد إيده ليا بالعيدية وهو مبتسم خد بقى عديتك كل سنة وأنت طيب.
وأنت طيب بس شكرا.
مفيش حاجة اسمها كدا أنت زيك زيهم إيه هنقولها كتير
إيدي وخدتها جوايا صوت طفل صغير فرحان بعدية أبوه اداهاله فرحان باللبس الجديد ومتحمس لصلاة العيد.
روحنا صلينا في جو كله بهجة صوت تكبيرات العيد طالع من المساجد والأطفال اللي بتجري في كل ناحية وإحنا الشلة اللي بقيت منها بنتصور صورة جماعية.
روحنا فطرنا و والدة عبدالله برضوا طلعت العيدية حاولت أرفض ولكن هي كمان أصرت أخدها ست حنينة بمعنى الكلمة اتمنيت كتير إن والدتي كانت تبقى حنينة معايا زي هي حنينة على الكل.
الليل ليل خلاص حجزت التذكرة سلمت عليهم وروحت المحطة ما أخدتش معايا غير شنطة باك على ضهري فيها حاجات بسيطة مش عارف ليه مش عارف ليه قلبي مطاوعنيش إني أخد كل حاجة.
دلوقتي أنا طالع الشقة بس وقفت لحظة بحاول أجمع نفسي قبل ما أطلع بصيت على الشارع والعمارة دا مكان قضيت فيه عمر طلعت وخبطت فتحت لي أمي وحضنتني.
أنت وحشتنا أوي يا ابني ليه تغيب الغيبة دي كلها عننا
وأنت كمان واحشاني كنت بدور على شغل علشان أثبت لكم إني مش فاشل.
وعملت إيه
اشتغلت في ورشة صيانة عربيات.
ورشة!!
آه ورشة يا أمي.
رد فعلها كان صدمة وإنها بعدت عني هاه دا أنا حتي ملحقتش احضنها طلع أبويا على صوتنا إتفاجئ لما لاقاني قدامه .
حمدالله على سلامتك يا بيه.
الله يسلمك يا بابا أنا كنت جاي أعيد عليكم وأرجع الشغل تاني.
وياترى البيه اشتغل إيه 
ميكانيكي.
والله!! طيب حاسب كدا لتكون ريحتك شحم ولا حاجة دا أنا قولت الواد هج وطفش قولت هيلاقي شغل عدل مثلا هيرفع رأسي زي باقي أخواته.
يعني أعمل إيه وأنا كل السكك متقفلة في وشي مش باصص على إنه بأخد لقمة بالحلال ليه حضرتك مش عايز تفهم إني دورت لحد ما تعبت فرميت حمولي على الله بكرا وبعده ربنا هيكرمني ويجبر بخاطري ويا عالم يمكن أبقى أحسن منهم كلهم بس وقتها هبقى أنا اللي بنيت نفسي.
أحترم أبوك يا ولد.
أحترم أبوك أحترم أمك انتوا على عيني وعلى رأسي بس أنا تعبتبعدها تقولي أحترم كل الناس علشان يتداس عليك بالجزمة زيك زي المداس متدافعش عن حقك وخليك ضعيف. أقولك يا أمي أنا ماشي علشان واضح كدا إن ملييش مكان وسط الحسب والنسب بتاعكم.
نزلت وأنا مهزوم نزل بروح راجل عجوز خزله عياله ورموه في الشارع رفعت رأسي للسما وأنا من جوايا بدعي إن ربنا يعوضني.
يا ابني مش هتقوم تروح الشغل
لاء يا عم عابد أنا آسف لحضرتك مش هقدر.
بقالك أسبوع مش راضي تطلع من اوضتك غير للمسجد وبعدها تروح على طول حتى قعاد معانا بطلت.
أنا آسف لو متقل عليكم.
أنت بقيت مننا خلاص يعني بلاش الكلام اللي يزعلني منك دا وبعدين تعالالي.
قربت منه بعد ما شاور لي خدني تحت باطه وحضني مقدرتش أتماسك عيطت وأنا مخزول وكسور إنسان خزلته الحياة وعايش مستني العوض من ربنا.
إهدى يا ابني ما تعيطش.
كسروني تاني يا عم عابد كنت مستنيهم يفرحوا طيب هو طماع
يعني أنا فعلا طماع وغلطت علشان مستنيهم يحنوا عليا مستنيهم يفرحولي مستني أحسن منهم إني أستحق إني استاهل يتفرح بيا وليا زي أخواتي.
طبطب عليا وهو بيقول لا تدري لعل الله يحدث بعد ذلك أمرا هي الدنيا إيه غير وقعات وهزايم وانتصارات وبعدين دي اختبارات من ربنا طب أقولك حاجة أنت ربنا بيحبك وقوي كمان.
رديت عليه وأنا مش فاهم ليه
علشان ربنا لما بيحب عبد بيبتلبه وبيختبره وربنا بيبتلي الإنسان فيما يحب يعني لو مثلا أنت نفسك في كلية وربنا أراد لك كلية تاني أنت هتزعل وتتقهر بس أنت مش عارف الحكمة دلوقتي بس صدقني وقت ما تعرفها هتفرح وهتحمده وتشكره افتكر إن لا يكلف الله نفسا إلا وسعها.
في القرآن الكريم قال الله تعالى في سورة البقرة ولنبلونكم بشيء من الخۏف والجوع ونقص من الأموال والأنفس والثمرات وبشر الصابرين البقرة 155
وفي الحديث الشريف قال النبي صلى الله عليه وسلم عجبا لأمر المؤمن إن أمره كله خير وليس ذاك إلا للمؤمن إن أصابته سراء شكر فكان خيرا له وإن أصابته ضراء صبر فكان خيرا له رواه مسلم.
فالابتلاءات جزء لا يتجزأ من حياة الإنسان والصبر والشكر فيها يؤديان إلى رضا الله وزيادة في الثواب. كما يقول المصري الصبر عند الضيق والشكر عند الرخاء يا رب يكون لنا قلوب صابرة وألسنة شاكرة.
خلص كلامه من هنا وأنا حسيت وكإن في راحة احتلت قلبي وكإني حسيت إن الكلام طبطب عليا وجهه بعده عم عابد وطبطب علي ضهري .
المهم أنا صالح ابني جدع وبمية راجل ووقت ما يقع بتبقى استراحة محارب وهيرجع أقوى وأحسن وأفضل من الأول علشان هو عارف إن الضړبة اللي ماتمومتش تقوي.
حضنته وأنا حاسس ومتأكد إن ربنا عوضني بعمي عابد وأولاده.
شكرا شكرا يا عم عابد.
عدا شهر قدرت أشد حيلي فيه وأرجع